Kom i gang: lage og publisere beskrivingar

I denne guiden vil du lære

• om kva tilgongar du treng,
• korleis lage beskrivingar, og
• korleis publisere beskrivingane til data.norge.no, og

Det er to måtar du kan lage og publisere dataskrivingar:

1. Du lagar beskrivinga i korrekt format sjølv og registrerer eit haustendepunkt data.norge.no kan hauste beskrivinga frå.
2. Du brukar Data.norge.no si registreringsløysing for å registrere og publisere beskrivingar.

Forarbeid: Rammeverk for informasjonsforvaltning og Orden i eige hus

Uavhengig av kva metode du vel bør verksemda få oversikt over kva data ho sit på. Digdir har laga ein eigen rettleiar, Orden i eige hus, for korleis få til dette.

Lag og publiser gjerne beskrivingar til Data.norge.no gradvis, samtidig som de held på med Orden i eige hus-arbeidet. De treng ikkje å ha oversikt over all dataen eller fullføre alle stega i rettleiaren før de publiserer beskrivingane.

Tilgongar og bruksvilkår

Før du kan registrere beskrivingar eller registrere eit endepunkt data.norge.no skal hauste frå:

• må du logge inn med ID-porten (sikkerheitsnivå 3),
• må du ha rett rettigheit eller rolle i Altinn, og
• må verksemda ha godkjent bruksvilkåra. Dette vert gjort første gong verksemda tek løysinga i bruk.

1. Hauste frå eige endepunkt

Om du ønskjer å forvalte beskrivingane sjølv, må du lage dei og gjere dei tilgjengelege.

Neste steg i rettleiinga viser korleis du lagar beskrivingar.

2. Registreringsløysinga på data.norge.no

Data.norge.no tilbyr ei skjemaløysing for å lage beskrivingar av datasett, datatenester, omgrep og tenester. Informasjonsmodellar og hendingar kan førebels ikkje bli beskrive i denne løysinga.

• Korleis lage beskrivingar med registreringsløysinga

Når bør du velje kva framgangsmåte?

Det finst ikkje eit endeleg svar på dette, men vi kan gi nokre grunnar til å velje det eine framfor det andre. De kan òg velje ulike løysingar for ulike ressurstypar de skal beskrive.

Grunnar til å lage og forvalte beskrivingane sjølv:

• Beskrivinga kan forvaltast nærare der sjølve dataen finst, noko som senkar terskelen for å halde ho oppdatert og korrekt.
• Verksemda er stor og forvaltninga av beskrivingane er delegert til fleire enkeltteam eller enkeltpersonar.
• Generering av beskrivingane er del av eit automatisert løp.
• Det er mange som gjer hyppige endringar på beskrivingane.
• Beskrivingane skal gjerast tilgjengelege for fleire og ikkje berre publiserast til Data.norge.no.
• De treng å bruke felt i spesifikasjonane som ikkje er støtta i registreringsløysinga.

Grunnar til å velje registreringsløysinga:

• Verksemda er lita og har lite data.
• Verksemda har ikkje høve til å setje opp eit endepunkt Data.norge.no kan hauste frå.
• Dei ansvarlege i verksemda ønskjer ein lågterskel måte å lage beskrivingar utan å setje seg inn i RDF.
• De treng ikkje å beskrive fleire felt enn dei som er støtta i registreringsløysinga.